Jahanda Hemmidin Uyghur Bolmaq Tes

[Tarim050709]

Jahanda Hemmidin Uyghur Bolmaq Tes

Bawudun Niyaz




Tepilmas dunyada bizdek natiwan,
Jahanda hemmidin Uyghur bolmaq tes.
Yat eldin kelgenler bizge hokumran,
Jahanda hemmidin Uyghur bolmaq tes.

Ezeldin bir emes tilimiz bizning,
Qoshulmas zadila qenimiz bizning.
Qandaqmu bir bolsun dilimiz bizning,
Jahanda hemmidin Uyghur bolmaq tes.

Cheylendi gul weten iplas ayaqta,
Bu hayat shatliqtin bekmu uzaqta.
Muqeddes arzular qaldi qayaqta,
Jahanda hemmidin Uyghur bolmaq tes.

Altunning ustide dessep turimiz,
Emma bek qisqidur bizning qolimiz,
Nimishqa shunche tar bizning yolimiz?
Jahanda hemmidin Uyghur bolmaq tes.

Yer- zimin bizningki, bayliq bizningki,
Tangritagh perzenti oghul- qizningki.
We lekin dert “elem hesret bizningki,
Jahanda hemmidin Uyghur bolmaq tes.

Tar keldi ozimiz torelgen weten,
Dozaqqa aylandi jennettek gulshen.
Quzghunlar makani boldi gul- chimen.
Jahanda hemmidin Uyghur bolmaq tes.

Talay ret at salduq, kelip gheyretke,
Qehrimiz yalqunjap tolup nepretke.
Yenila yar bolduq qayghu- hesretke.
Jahanda hemmidin Uyghur bolmaq tes.

Eslisek bizdimu kop iken illet,
Shunglashqa ghepletke qaptu bu millet.
Qeni shu ejdatlar yaratqan hislet?
Jahanda hemmidin Uyghur bolmaq tes.

Yuwashliq qilip biz qalduq balagha,
Yetmidi ahimiz kengri samagha.
Duch kelduq talay ret sulhi salagha,
Jahanda hemmidin Uyghur bolmaq tes.

Ingraydu elemdin miskin helqimiz,
Titreydu ghezeptin dertlik qelbimiz.
Hich bundaq emesti bizning tektimiz,
Jahanda hemmidin Uyghur bolmaq tes.

Ketkechke kop qetim qoldiki purset,
Biz ajiz reqipler boldi bequwwet.
Igiler we lekin sunmas heqiqet.
Jahanda hemmidin Uyghur bolmaq tes.

Gherpni acharken sherqtin kelip,
Bularken talarken gejgige minip.
Biz bolsaq wetende musapir gherip.
Jahanda hemmidin Uyghur bolmaq tes.

Tizilghan heywetlik ret- ter imaret,
Qilidu uningda kimler tapawet?
Uyghurgha bu jayda barmu ijazet?
Jahanda hemmidin Uyghur bolmaq tes.

Ittipaq inaqliq sozliner shunde,
Barawer tengliktin esir yoq qilche.
Herqachan hemradur bizge ghem- ghusse.
Jahanda hemmidin Uyghur bolmaq tes

Qarisang kozungni oyumen deydu,
Sozliseng tilingni kesimen deydu.
Konmiseng qeningni ichimen deydu.
Jahanda hemmidin Uyghur bolmaq tes

Ziminni qaplidi ahimiz bizning,
Pelektin halqidi zarimiz bizning.
Daima perishan halimiz bizning,
Jahanda hemmidin Uyghur bolmaq tes.

Tangritagh baghrida huwlaydu boran,
Neshterdek sanjilar mudhish shiwirghan.
Bahardin Derek yoq bunda hich- qachan,
Jahanda hemmidin Uyghur bolmaq tes.

Ot yurek Sadirning ewladi qeni,
Alemni titretken ejdadi qeni ?
Gestonni gum qilghan Perhadi qeni?
Jahanda hemmidin Uyghur bolmaq tes.

Zulmette Ay- Yultuz sirdashtur bizge,
Horiyet “Erkinlik dildashtur bizge
El- weten her waqit mungdashtur bizge.
Jahanda hemmidin Uyghur bolmaq tes.

Turulup ghezeptin bilek bir kuni,
Ot bolup yanidu yurek bir kuni.
Ashidu emelge tilek bir kuni.
Dimeymiz shu chaghda Uyghur bolmaq tes.

[Tarim050709]

Rozi Sayit Shiirigha atap

Toghraq


Rozikam dep otti "dixan bolmaq tes" ,
Chaqchaqkam dep otti "juwan bolmaq tes" ,
Hezilkam dep otti "haywan bolmaq tes" ,
Hemmining derdi bar, derman bolmaq tes ,
Jahanda uyghurgha insan bolmaq tes .

Insanning alemde shohriti tola ,
Her jayda her janning qismiti tola ,
Baghda xar , taghlarda qimmiti tola ,
Shunglashqa yazmamda hékmiti tola ,
Jahanda uyghurgha insan bolmaq tes .

Japaning aldini dixandin sorang ,
Bextini yamalghan chapandin sorang ,
Qerzini hosulluq xamandin sorang ,
Derdini yérilghan alqandin sorang ,
Jahanda uyghurgha insan bolmaq tes .

Dixan'gha hokümran bilimsiz kadir ,
Ularsiz muqimliq bolmasmish hazir ?...
Ularsiz topilang bolarmish sadir?..
Ammisiz emeldar némige qadir?!!
Jahanda uyghurgha insan bolmaq tes .

Kadirmu dertmenmish...Tokmise téxi ,
Chongigha bélini pükmise téxi ,
Her küni haraqqa chokmise téxi ,
Pare yep pakliqqa mokmise téxi!..
Jahanda uyghurgha insan bolmaq tes .

Ishchining künighu kadirdinmu tes ,
Japasi meylighu , muash alsa bes!
Muashmu bir séri , ishsiz basar nes!
Ishsizgha bu jahan be-eyni qepes!
Jahanda uyghurgha insan bolmaq tes .

Ishchining oyide bardur balisi ,
Kündilik turmushta koptur chalisi ,
Xejleshke satqili ya yoq kalisi?..
Xudagha yetmidi yaki nalisi?!...
Jahanda uyghurgha insan bolmaq tes .

Dukandar qaxshaydu " soda bek az " dep ,
" Tijaret némandaq kasat bu yaz ? " Dep ,
Bajgirlar hürpiyer " baj tole maz " dep ,
" Gep bolsa merkezge téz erz yaz " dep ,
Jahanda uyghurgha insan bolmaq tes .

Haramning yolliri paydigha ochuq ,
Halaldin ézlenseng bek kichik yochuq ,
Yawuzgha nan pütün , yuwashqa puchuq ?!...
Adalet izleydu qanundin qarchuq!...
Jahanda uyghurgha insan bolmaq tes .

Qimarwaz birini biri utidu ,
Oynisa héch gep yoq , utsa tutidu ,
Zang pulluq saqchigha payda mutidu?!...
Utturghan...Utqanmu achchiq yutidu ,
Jahanda uyghurgha insan bolmaq tes .

Nurghun qiz olümdin hayatni xalap ,
Amalsiz kochida bolidu **** ,
Jem'iyet tillaydu ét keni talap ,
Eytingchu kim mes'ul bu ishqa janap?!..
Jahanda uyghurgha insan bolmaq tes .

Yanchuqchi déyisher ishsiz yashlarni ,
Yash turup qériliq basar bashlarni ,
"Ghojamlar" korelmes ünsiz yashlarni ?!..
Korsimu koz qésip , atar qashlarni!...
Jahanda uyghurgha insan bolmaq tes .

Sebiler yighlishar " oqushsiz qaldim " dep ,
Situdént qaxshaydu " ishsiz qaldim " dep ,
Iqtisas igisi kem bizde ejep?!!...
Muarip nelerde chorgiler mengdep ?!!!...
Jahanda uyghurgha insan bolmaq tes .

Anilar zarlaydu bala derdide ,
Atilar mey ichip yürer zerdide ,
Jan paxal-qimmetsiz zaman nerqide!...
Ne sir bar...Kozlerni tosqan "perdide"?!!
Jahanda uyghurgha insan bolmaq tes .

Qoymichi bolmaqliq hünerning ongi ,
Qoyilar her bapta pishshighi - tongi ,
Rahette yashaydu kichigi - chongi ,
Qoymighan qoylarning qalmidi yungi!..
Jahanda uyghurgha insan bolmaq tes .

Qoymichi bar iken hokimettimu ,
Niqapta yürerken siyasettimu ,
Hem barken méhrapta - ibadettimu?!..
Qanunning ichide - adalettimu ?!...
Jahanda uyghurgha insan bolmaq tes .

Nime dey jahanning kari - barigha ?
Tuz septim saqaymay turghan yarigha .
Qelimim chidimas muhtaj zarigha!
Ilhamim yarimas yaki parigha?...
Jahanda uyghurgha insan bolmaq tes .

Shairlar tenglikte turup kétidu ,
Yazsa ger " qelimi qurup" kétidu!..
Yazmisa "elimi urup " kétidu !..
Rast yazsa "ghojamlar boghup " kétidu .
Jahanda uyghurgha insan bolmaq tes .

Insanda insaniy wijdan bolmaq tes!
Wijdansiz - toghrigha imkan bolmaq tes!
Nadan'gha xatadin pushman bolmaq tes!!...
Adalet textige sultan bolmaq tes!...
Jahanda hemmidin insan bolmaq tes .