Myunxén shehiride noruz bayrimi ötküzüldi

[Aziz Isa Elkun]

Myunxén shehiride noruz bayrimi ötküzüldi

Ixtiyari muxbirimiz ekrem
2012-04-02


4 - Ayning 1 - Küni gérmaniyining myunxén shehiride 300 din artuq uyghur we chetellikning qatnishishi bilen noruz bayrimi daghdughiliq ötküzüldi.



RFA/Ekrem
Myunxén shehiridiki noruz bayrimidin bir körünüsh

Gérmaniyining myunxén shehride ötküzülgen bu yilqi noruz bayrimigha gérmaniyining herqaysi sheherliridin kelgen yüzligen uyghurlardin sirt, engiliye, amérika, gollandiye qatarliq döletlerdin kelgen köpligen uyghurlar, türkler we gérman puqraliri ishtirak qildi. D u q ning sabiq reisi erkin aliptékin ependi bashchiliqidiki qurultay rehberlirimu noruz tentenisige jör boldi. Uyghurche mungluq naxshilar, güzel usullar, qiziqarliq yumurlar bilen tolup tashqan bu paaliyet tamashibinlarni hayajanlandurdi.

Bu yilqi noruz paaliyitini bash shitabi gérmaniyining myunxén shehiride bolghan yawrupa sherqiy türkistan birliki teshkilati bilen engiliye paytexti londunda paaliyet élip bériwatqan londun uyghur ansambili birlikte uyushturghan bolup, paaliyet mezmunining molliqi, senetkarlarning uchisidiki chetelliklerning közlirini qamashturidighan sap milliyche kiyimler, mungluq küyler hem lerzan usullar zor alqishqa érishti.

Bolupmu, yashlar teripidin orunlanghan qoyuq siyasiy tüske ige bolghan ijadiy naxshilar we milliy shuarlar 300 kishilik bu zalni lerzige keltürdi. Tamashibin uyghurlar sehnidiki artisqa masliship «uyghurlargha erkinlik! uyghurlargha azadliq!» dégendek shuarlarni jör bolup towlap, zal ichide küchlük milliy keypiyat yaratti.

Uyghur jamaet erbapliridin ablimit tursun ependi qiziqarliq yumurliri bilen tamashibinlarni küldürdi. Myunxéndiki senetkar xalise xanim yillardin buyan qétiqinip terbiyiligen yash qiz - Oghullarning usullirini tamashibinlar chawak sadaliri bilen téximu janlandurdi. Londun uyghur ansambilining artislirimu öz maharetlirini körsitip, tamashibinlarni köp hozurlandurdi. Ablimit tursun ependining 2009 - Yilidiki 5 - Iyul weqesige atap éytqan yumurliri uyghur jamaitining alqishigha érishti.

Noruz paaliyiti myunxén shehiridiki bir aliy mektepning senet zaligha orunlashturulghan bolup, zalgha tamashibinlar pétishmay qaldi. Riyasetchiler siritta yene yiraqlardin kelgen köpligen uyghurlarning zalgha kirish üchün öchiret saqlawatqanliqini, orun qisliqi tüpeyli kirelmeywatanliqini eskertip turdi. Paaliyet chüshtin kéyin saet 5:00 bilen bashlinip töt saet dawam qildi. Uyghur we chetellik tamashibinlar bu qétimqi noruz paaliyitidin köp memnun bolushqanlirini bildürüshti.

Copyright © 1998-2011 Radio Free Asia. All rights reserved.

_______________________

Xewer menbesi:

http://www.rfa.org/uyghur/xewerler/tepsili_xewer/germaniye-noruz-04022012210321.html/story_main?encoding=latin

Xewerni anglash:

http://www.rfa.org/uyghur/xewerler/tepsili_xewer/germaniye-noruz-04022012210321.html/u0402-ekrem.mp3