Uyghurlar "8-mart dunya ayallar bayrimi " ni tebriklimesliki kérek

[Aziz Isa Elkun]

Uyghurlar "8-mart dunya ayallar bayrimi " ni tebriklimesliki kérek
 


Uyghurlar kommunist idé’ologiyisini özining qelibnamisi qilghan "8-mart dunya ayallar bayrimini tebriklimesliki kérek!
 
Facebook we bashqa tor sehipilliride uyghurlar bes-beste "8-mart dunya ayallar bayrimi" ni tebrikleshni bashliwetti. Biraq men en’gliyege kélip yashawatqili kop yillar boldi emma birer qétimmu bu atalmish "kommunist sowét sotsiyal"  idé’ologiyisini özining heriket nishani qilghan bu bayramni kishilerning tebrikligenlikini anglap baqmidim. Bu bayram toghrisida adette hetta metbu’atlardimu xewerler bérilmeydu. Bu bayramni en’gliyedila emes, yawropa we amérika, kanada qatarliq pütkül gherb döletliride tebriklenmeydu. Emma xitay kommunistliri ishghaliyitidiki wetinimiz sherqiy türkistanda bu bayramni da’iridiki xitay hökümiti teripidin her yili daghdugha bilen  tebrikleydighanliqi ésimde.  
 
Wetendashlirimgha shuni tewsiye qilmaqchimenki sabiq qizil sowétlar qaldurup ketken we bügünki milletchi xitay oz hökümranliq hakimiyitini dawamliq saqlap kélish üchün qolliniwatqan bu insan tebi’itining mentiqisige tüptin qarshi bolghan we shu sewebtin milyonlighan insanlarning jénigha zamin bolghan bu zeherlik kommunist idélogiyesining tesiridin özimizni qutuldurayli. Bu idélogiyening herqandaq bir tesiridin özimizni yiraq tutayli.
 
Belkim siz "bu dégen dunya boyiche tebriklinidighan xanim-qizlar bayrimi, biz uyghurlar xanim-qizlirimizni bu bayram arqiliq tebriklisek néme yamini bolidu…" dep talishishingiz mumkin. Toghra, bu bayram tunji qétim  1909- yili 28- féwral amérika sotsiyal partiyisi teripidin resmiy tebrikligendin kéyin bu yéngidin meydan’gha kelgen bu "sotsiyalizm, ayallarning hoquqini qoghdash" qatarliq xanim-qizlarning jem’iyettiki ornini yuqiri kötürüshtin ibaret heriketning türtkiside pütün dunyagha tizdin kéngeygen we bolupmu 1917- yilidiki rusiye öktebir inqilabidin kéyin sowétlar ittipaqi bu bayramni "wetenperwerlikini teshwiq qilish" meqsitide meqsitide resmiy tebrikleshke bashlighandin kéyin sowét ittipaqi dairisidiki kommunist-sotsiyal döletliride hökümetlerning teshbbuskarlighi bilen tebrikleydighan bayramgha aylan’ghan.   toghra, uyghur jem’iyitide meyli islami örp-adetler tüpeyli bolsun weyaki xitayning siyasiy tüzülmisi sewebliridin bolsun uyghur xanim-qizlirining jem’iyettiki heq-hoquqliri turmushning ijtima’iy we siyasiy sehniliride téxi toluq kapaletke ige qilin’ghini yoq. Emma xelqimizni bu yüzige shéker sépilgen emma ichi zeher bilen tolghan "kommunist" i idé’ologiyisini asas qilghan bayramni wetinimizde 60 nechche yillardin biri xitay hökümiti özining "wetenperwerlik' teshwiqati bilen tentenilik élip bérip kéliwatqan bolsimu netijide uyghur xanim-qizlirining bügünki hayatigha qandaq özgirishlerni élip keldi?
 
Hemmimizning xewiri bar, xitay hökümiti hettaki uyghur ayallirining tebi’iy hoquqi bolghan perzent körüsh hoquqighimu ige emes. Yash quramigha yetmigen qizlirimiz xitay döliti teripidin yürgüzülüwatqan "adem etkeschiliki" ning ziyankeshlikige uchrap ichkiri ölkilerde erzan emgek küchi we jinsiy qilinip xarliniwatidu. Uyghur perzentliri bolsa oz anisining ana tili terbiyisidin mehrum qilindi.  Mana mushundaq bir dölet tüzümide yashawatqan uyghurlar xanim - qizliri qandaqmu xitay hökümiti suy istémal qilip kéliwatqan, kommunizm, dinsizliq we 'xitay kommunist partiyisige shertsiz boysunushni telep qilidighan  bu atalmish " 8- mart dunya xanim-qizlar bayrimi" tebriklisun?!biz uyghurlar ézilish, xarliq mehkumlighidin, döletsizlik teqdiridin oz qeddimizni turghuzush üchün hayat-mamatliq küreshke atlan’ghan yöleksiz xelq. Bayram-tebrikleshler, külkiler bizge anche yariship ketmisimu emma bek tebrikligimiz kélip ketse insanning tebi’iy xususiyitige ige bolghan, héch qandaq siyasiy gherez yoshurulmighan, aililerge méhri muhebbet ata qilidighan bayram- "anilar bayrimi" we "atilar bayrimi" ni tebrikleyli. Mesilen, anilar bayrimini 3- ayning 18- küni en’gliye, amérika we barliq ereb dunyasi tebriklinidu we bu künde japakesh anilargha minnetdarliq bildürülüp gül teqdim qilinidu. Atilar bayrimimu oxshashla 6-ayning 17- küni dunyadiki nurghunlighan döletlerde tebriklinidu.  Biz mana  dunyadiki eng hörmetke sazawer kishiler bolghan, oz perzentlirini ming bir japalarni tartip béqip chong qilip qatargha qatqan söyümlük ata-animizning bayramlirini tebrikleyli, ulargha maddiy we meniwi söygü ata qilayli we bu islamiy eqide boyichimu bir perzent üchün qilishqa tégishlik mejburiyettur!
 
Uyghur wetendashlirim, démekchimenki qarighularche bashqilarning arqisidin egeshmeyli. Bolupmu biz uyghurlar üchün qilidighan ishlar, tebrikleydighan xasiyetlik künler nurghun we nurghun…. Shu künlerni xatirileyli, oz tariximizning shanliq enenilirini yad éteyli.  Söyümlük ailimizge, möhterem ata-animizgha her waqit söygü bexsh éteyli.  
 
https://www.facebook.com/notes/london-uyghur-ensemble/uyghurlar-8-mart-dunya-ayallar-bayrimi-ni-tebriklimesliki-kérek/10150836163629256