Yazghuchi we zhurnalist Memtimin Hoshur

[Oghuz]

Yazghuchi we zhurnalist Memtimin Hoshur

 Yazghuchi we zhurnalist memtimin hoshur 1944-yili ghulja shehiride qol hünerwen a’iliside tughulghan, 1951-yildin 1956-yilghiche ghulja shehiridiki «murad» mektepte, 1956-yildin 1962-yilghiche ghulja sheherlik 3-ottura mektepte oqughan, 1962-yili shinjang uniwérsitétining til-edebiyat fakultétigha oqushqa kirgen, 1967-yili oqush püttürgendin kéyin, bir mezgil memuriy organlarda kadir, 1979-yildin tartip «ili deryasi» zhurnilining mes’uli, ili qazaq aptonom oblastliq yazghuchilar jem’iyitining mu’awin re’isi we kespiy yazghuchisi bolup ishligen, kéyin shinjang uyghur aptonom rayonluq edebiyat-sen’etchiler birleshmisining mu’awin re’isi, aptonom rayonluq yazghuchilar jem’iyitining re’isi bolghan. Memtimin hoshur edebiy ijadiyet sahesige 1965-yili élan qilin’ghan «alma» namliq hékayisi bilen kirip kelgen, shuningdin étibaren, bolupmu 70-yillarning axirliridin tartip proza sahesige yéngiche bir xil hayatiy küch bilen kirip, hazirghiche «naxsha», «bu, chüsh emes», «musapirlar qawiqida», «ayxan», «sarang», «burut majrasi», «qirliq istakan», «altun chishliq it» qatarliq bir türküm hékayilarni; «nuzugum>, «sawaqdashlar», «salam, hésam aka», «xasiyetlik qar» qatarliq bir qisim powéstlarni yézip, edebiyat saheside we kitabxanlar arisida yaxshi bahagha érishken. Uning hékayilirining muweppeqiyiti alahide üstün bolup, uyghur hazirqi zaman hékayichiliqida muhim orun tutidu. Uning eserlirining syuzhiti qiziqarliq, qurulmisi tebi’iy hem yéngiche, tili rawan. Külke-uning eserlirining tebi’iy hemrahi, uning köp qisim eserliri bashqa tillargha terjime qilin’ghan.

Memtimin hoshur proza ijadiyiti bashqa, edebiy obzor, edebiy axbarat we edebiy terjime ishliri bilenmu shughullinip, «ili uyghur tiyatirlirining qisqiche tarixi», «ajayip turmush, ghelite mentiqe», «10 yilliq hékaye ijadiyitimiz» qatarliq maqlilerni, «alim bolmaq asan emes» qatarliq edebiy axbaratlarni, «yillar shundaq ötken» namliq bi’ografik qissisini yazghan, «ih, 15 yashliq xalidem» qatarliq bir qisim hékayilarni uyghur tiligha terjime qilghan.Memtimin hoshurning hairghiche neshr qilin’ghan eserliridin «ney awazi» (1982-yil, shinjang xelq neshriyati), «kona-yéngi ishlar» (éziz sawut bilen bille, 1986-yil, milletler neshriyati) namliq hékayilar toplamliri, «salam, hésam aka» (1990-yil, shinjang yashlar - ösmürler neshriyati) namliq powéstlar toplimi, «bu, chüsh emes» (1991-yil, shinjang xelq neshriyati) namliq hékayilar toplimi, «yillar shundaq ötken» (1991-yil, shinjang xelq neshriyati) namliq bi’ografik qissisi, «ölükke yézilghan xet» (1993-yil, qeshqer uyghur neshriyati) namliq hékayilar toplimi, «qum basqan sheher» (1996-yil, shinjang yashlar-ösmürler neshriyati) namliq romani qatarliqlar bar. Memtimin hoshur hazir kandidat aliy muherrir, junggo yazghuchilar jem’iyitining ezasi, junggo az sanliq millet yazghuchiliri ilmiy jem’iyitining ezasi.