|
|
Yillargha jawap
Lutpulla mutellip
Waqit aldirangghu ,saqlap turmaydu ,
Yillar shu waqitning eng chong yorghisi .
Aqqan sular , atqan tanglar qaytilanmaydu ,
Yorgha yillar ömürning yaman oghrisi .
Oghrilapla qachidu arqigha yanmay ,
Bir - birni qoghliship yorghiliship .
Yashliq béghida bulbullar qanat qaqmay ,
Yopurmaqlar quyilidu poliship .
Yashliq ademning zilwa bir chéghi ,
Tolimu qisqa uning ömri biraq .
Yirtilsa kalindarning bir wariqi ,
Yashliq gülidin tökülidu bir yopurmaq .
Yillar shamili yelpünidu , izlar kömilidu ,
Yopurmaqsiz derex bichare bolidu qaxshal ...
Yillar séxi , quruq kelmeydu , ekilip biridu ,
Qizlargha qoruq , erlerge saqal .
Biraq , yillarni tillash toghra kelmeydu ,
Meyli, ötiwersun özining yoli ...
Ademlermu waqitni qoldin bermeydu ,
Chöllerni bostan qilghan ademler qoli .
Yillarning qoyni keng , pursiti nurghun ,
Taghdek ishlar yillar bilen öre turidu .
Qarap baq , axshamqi bowaq kichikkine tursun ,
Tünügün ömilep , he ... Bügün méngip yüridu .
Küreshchan balilar qoghliship yillar ,
Küresh newrilirini choqum tapidu .
Axsham bext üchün qurban bolghanlar ,
Qebrisini yadlap güller yapidu .
Meyli , saqal sowgha qilsa qilsun yillar ,
Menmu tawlinimen yillar qoynida .
Ijadim , shé’irimning iz tamghisi bar ,
Aldimdin qichip ötken her yil boynida .
Qérimasmen küreshning keskin chéghida ,
Shé’irim yultuz bolup yanar aldimda .
Ölüm peste qélish , küreshning dawanliq téghida ,
Chidam - gheyretning yenggini herdem yadimda .
Ésilarmen miltiq étip tawlan’ghan qolgha ,
Yépisharmen bayraq bilen algha atlighan yolgha .
Küresh bayawinida harmasmen esla ,
Yéngish bilen kélip chiqimiz keng ghalip yolgha .
Yillar , meydengni tutup qaqaqlap külme ,
Aldingda qizirishtin artuq körimen ölümni .
Qéritimen dep artuq köngül bölme ,
Axirqi jengge atap qoyarmen oghlumni .
Yillar déngizi dolqunluq bolsangmu ,
Opqunliringni yaridu bizning karap .
Yilning ötüshi bilen qorqutup baqsangmu ,
Ijad yillarni qéritidu , dep bérimiz jawab .
1944- yil yanwar , Aqsu
|
Locked
